大阪十天遊 Day 8 : 離開白濱，返回難波

大部份的溫泉旅館都包早餐的，同埋 check-out 時間都係十點咁上下，基本上想訓晏係無可能，今朝一早就起身去食早餐，之後再浸多浸溫泉就走人。個早餐同琴日梅樽那個早餐爭好遠，哩個早還超豐富 (掛住食，唔係影了好多相)，有乜理由早餐要食咁多野?

無記錯的話哩個應該係龍蝦粥

哩個九宮格，樣就好精美喇，但我唔太鍾意

食飽就 check out 走人，見仲有幾個鐘先要還車，我地就去了 "三段壁" 同 "千疊敷"，哩2個係白濱旅遊景點，有時間的話可以一去，但如果趕時間的話，不去亦不太可惜。影了幾張相，買了包準長炭就去還車。

還車過程都好順利，其實那間租車公司都幾細，得幾部車，我估佢平時都無乜生意。還車後他們還車我地返去 tore tore market 搭車返大阪。由於時間尚早，唯有又食野啦，見到有人劏吞拿魚，我地當然要買返一盒 toro 食啦。好好味喲 ~ 我地搭 12 點半車，食完仲有時間買野，呆太太就買了一支柚子酒 ( 我就對哩類柚子酒呀、梅酒呀無乜興趣喇，我覺得似藥水味多D .... 嘿嘿)。

超肥美 toro

走喇 ... tore tore market ~

坐明光巴士返大阪，到步大約 3 點 9，返酒途中經過地下街一間叫 "豚睛" 的吉列專門店，個樣都好似唔錯，又有點肚餓就一於試試啦。因為未到晚飯時間，店內唔係太多人，我地一人叫了個定食 .... 味道一般，唔係唔好食，但又未至於好好食囉，同埋我覺得佢炸得有一點燶，不過價錢就抵食，2 個定食都只係 2810 yen。