大阪 10 天遊 Day 1 : 難波、心齋橋

8 點出發，9 點到達機場，拿拿聲 check-in 上機。時間計算得剛剛好，唔駛等就可以上機。未夠 3 點到達關西空港，先到 KAA 旅行服務台購買 3 Day Kansai thru pass (成人 5,000 yen，小童 2,500 yen) 詳情可參考哩度，此服務台亦有售海游館、環球影城等門票。

買完 Kansai thru pass 上一層，找南海電鐵的入口坐車到難波 ~

我地入住 Hotel Vista Grande Osaka，HK$890 一晚唔包早餐，距離難波駅 15 號出口 (hep) 約 10 分鐘路程。哩間酒店都幾抵住，入面都幾新淨，每層樓有自動售賣機，房入面又有免費上網，一落街有野食又有野買 ... 係夜晚街上會有人兜搭你囉 ~ 呵呵。

日本第一餐我地食 "一蘭" 拉麵，介紹就睇得多，今次我地都係第一次食。入到去先買飛，買飛過程無乜難度，之後店員會給你一張紙，你可以選擇不同的口味，包括湯的濃淡度、油膩程度、要唔要大蒜、要唔要蔥 (多蔥是要另外加 100 yen 的)、要唔要叉燒、要唔要辣、同埋麵的軟硬度，之後店員就會安排坐位。真係唔講得笑，好好味 !!! 未試過一定要試 !!!

先入錢買飛

之後就可以揀選個人口味喇

哩個牌會話俾你知邊度有空位，但其實店員係會幫你安排坐位的，可以放心

排排坐等食麵

一蘭個湯底真係好好味 ~

食飽飽，到心齋橋購物街行行 ...
睇書話大丸下面有間叫 "まい泉" 的豬扒三文治好好味，於是就走入去搵搵，一盒要 1,xxx yen，未食過就試一試啦 ... 但原來只係一般 ... (失望)，行多一陣，返酒店放抵野休息一陣，我地決定去食河豚。

賣相唔錯，係味道爭D

出發前我將所有會去的影點或者食店全數放晒入 google map，去到用 Rmap + GPS 就可以唔駛 data charge 用到 google map。但我輸入食店時居然無入到店名，只係輸入了 "河豚" .... 哈哈，我地去到附近時，唔知係咪呆太太饑到傻定係俾鬼整，見到一間店前掛了一條大大雞泡魚就二話不說衝入去，我地點了 2 個餐，有河豚刺身等等 ... 但味道一般，無咩特別。離開後就在此店不遠處又有一條大大的雞泡魚，看看店面及店名，我地先知原來我地去錯了另一間 ... oh !~