大阪十天遊 Day 6 : 白濱

我地哩十日行程入面，有 3 日 2 夜會去白濱浸溫泉，今日就要出發前往白濱喇。有 2 個方法可以去白濱，到難波 OCAT 搭明光巴士 (車程大約 3 個半小時，車費為 5,000 yen 來回)，或者搭 JR 到白濱站 (約 2 個半小時，車費約 5,000 yen)。搭 JR 會快一點，但價錢就貴一倍，所以我地都係決定搭巴士。大阪到白濱的明光巴士每一小時一班，但建議都係預早一兩日買定飛。難波 OCAT 在 JR 站附近，跟住 OCAT 個指示就會搵得到，買飛同上車的位置在 2 樓。

我地搭 10 點 10 分車，大約 9 點出發，去到 OCAT 食個早餐之後就去等車。日本的長途巴士其實都幾好搭，行車穩定而且到站會有提示，全程訓覺都無問題。1 點多就到到白濱 tore tore 市場，時間剛剛好，可以在 tore tore 食個 lunch 先。Tore tore 市場唔似黒潮市場咁景點 feel，入面比較似街市而且價錢比黒潮市場平。食完 lunch，就去返頭先落車個地方搭白濱的市內巴士到溫泉旅館，市內巴士班次非常疏落，我地第一晚會住南紀白浜梅樽温泉，剛好門口就係巴士站。