Day Three - 殘波岬燈塔、ORION 啤酒廠、Nago Pinapple Park

by 5:25 PM

一早起身就見到個大海 ...... 感覺非常好,哈哈哈。

先預告一下,今日行程包括: "殘波岬燈塔"、"ORION 啤酒廠" 同埋後加的 "Nago Pineapple Park"。食方面有 "都屋漁港"、"浜の家" 同埋 "琉球亭"。

9點起身,先去Deli (Resort 內其中一間西餐廳) 食個早餐先 ...... 估唔到哩度個早餐又幾好食喎真係,少少地,但幾精緻。



食完早餐就在酒店Hea下,之後過對面沙灘仔行下 ...... 好優遊自在喲 ~~







之後返去執拾行裝就出發去"殘波岬燈塔",哩個又係其中一個沖繩必到景點。由於"殘波岬燈塔"正進行維修,所以無法入內,我地影完相、自拍完就過隔離 "御果子御殿" 買手信。



御果子御殿最出名的其中一款手信係 "紅いもタルト" (元祖紅薯蛋撻),但我試過覺得普普通通。個人推介 "塩胡麻ちんすこう" (雪鹽餅) 同 "プリンセスムーン" (Princess Moon 小蛋糕 - 菠蘿味)

元祖紅薯蛋撻

雪鹽餅

Princess Moon 小蛋糕 - 菠蘿味 (哩幅圖係檸檬同橙味)


搞完一輪又係時候去搵食喇,今次去"都屋漁港",哩間係一間漁民的食堂,可供選擇的款式唔多 (無記錯應該只係得3款),但就新鮮好味同埋夠平。




下一站係"ORION 啤酒廠",佢個名應該係叫 Orion Happy Park。哩度就好似細路仔時參觀可樂廠咁,睇下生產過程,同有人介紹下咁,不過只得日文,基本上係唔知佢講乜,而唯一吸引處係參觀完之後有得免費試飲新鮮啤酒,而且參觀亦都係免費的,但要注意要先預約,有興趣的話可於當日叫酒店櫃位幫忙預約就可以了,同埋要留意時間,詳情自己上佢個 Website睇。佢地仲有一隻無酒精啤酒,係俾駕車人士飲,味道同真啤酒我諗有7成相似,未試過可以試下。





哩個就係無酒精啤酒
離開"ORION 啤酒廠"基本上我地當日預定的行程就完架喇,但由於時間尚早,我地決定去埋"Nago Pineapple Park",咁聽日就唔駛咁趕啦。



而我不知道菠蘿在那裡 !?
哩個 "Nago Pineapple Park" 其實都幾搵笨,要入場費先可以入去"參觀"同埋買野 (但要入場費都好多人去喎?!)。去到先坐無人駕駛車參觀菠蘿園,但唔好咁大期望,因為唔係你想像的超大菠蘿園,只係一個花園仔,同埋我見唔到有菠蘿囉入面。之後就係賣野的地方,所有產品都同菠蘿有關,有菠蘿酒、菠蘿蛋糕、菠蘿菓子、菠蘿雪糕,就連一個個的菠蘿都有 (但明明佢個菠蘿園入面一個菠蘿我都見唔到,菠蘿從何來?)。我地都買左唔少野,不過其實哩個"Nago Pineapple Park"我諗只係一個昆遊客買野的地方。入面賣的產品,那霸士入面的 Duty Free 都有一個櫃位賣,不過價錢就貴一點點囉。去唔去,自己揀啦 ~

玩左一日,又係時候食晚餐喇,今次目標係"浜の家"。




哩個龍蝦,推介 ~~

哩間"浜の家",門口唔多起眼,我地兜左2個圈先至搵到。但食物真係好味,價錢又唔貴,推介!! 不過有一樣唔好,有半間鋪都係香港人,真係爭D唔記得自己係身處沖繩。

食完返返 Resort ...... 原來好近咋喎,真係唔知添。

返到去休息一陣,我地又去左附近食宵夜 (哈哈,痴線)。我地唔係食唔飽,只係想食多幾餐,食多幾樣唔同款式。今次試左間沖繩料理"琉球亭",即係沖繩版居酒屋。同日本居酒屋唔同,無雞翼食;我地叫左苦瓜蛋、豬軟骨等等......都幾好味,幾有特色。


沖繩基本上無夜生活 (可能有我地唔知呢~),食完就乖乖地返去訓覺啦。準備聽日去水族館 ~ Yeah ~

自駕遊心得: 日本的導航其實已經好方便,輸入電話已經可以搵到超過9成的目的地,如果搵唔到就可以用 Map Code,Map Code 其實即係地圖座標,係一定搵到的。不過沖繩的道路就沒想像中咁好走,路牌唔多,好多時要去到路口先會見到路牌;同時日本人又好守規矩喎,唔會亂 Cut 線,所以就會出現差不多7、8百米就已經會出現等轉灣的車龍 (但其實係仲有2、3個路口喎),我地唔熟路,又唔見路牌,無理由咁早就行定左線等左轉掛,但當你在右邊好順暢咁行左7、8百米就會發現你無法左轉喇 ...... 哩個問題我地沖繩之旅發生了都有2、3次,為免好樣衰地去到龍頭先 Cut 線,咁就唯有死死地氣跟住導航再兜遠路啦 ...... 所以見到一條線排晒長龍一條線無車行時就要留意下喇。

參考資料
  • 殘波岬燈塔
    營業時間: ---
    地址: 中頭郡讀谷村宇座
    電話: ---
    MapCode: 1005 685 237

  • 御果子御殿 (読谷本店)
    營業時間: 8:30-21:00
    地址:読谷村字宇座657-1
    電話:098-958-7333
    MapCode: 1005 656 404

  • 都屋漁港
    營業時間: 10:00-19:00
    地址:沖縄県読谷村字都屋33
    電話:098-956-1640
    MapCode: 33 792 300

  • ORION 啤酒廠
    營業時間: 9:20-16:40
    地址:名護市東江2-2-1
    電話:098-052-2136
    MapCode: 206 629 000 (此為 Orion 對面停車場的 MapCode)

  • 浜の家
    營業時間: 11:00-22:00
    地址:沖縄県国頭郡恩納村字仲泊2097
    電話:098-965-0870
    MapCode: 206 035 759

  • 琉球亭
    營業時間: 17:30-24:00
    地址:沖縄県国頭郡恩納村字谷茶1593-8
    電話:098-989-4991
    MapCode: 206 158 072

Day Two - 玻璃體驗+Agu豬午餐+石垣牛晚餐

by 5:15 PM
第二日要轉酒店,去恩納村 Kafuu Resort Fuchaku CONDO HOTEL。一早起身執好行裝就落樓下 Check-out,自駕的好處係行季可以放晒上車,去邊都話咁易。

今日早餐係苦瓜漢堡 ......




其實沖繩無乜得幾多地方食早餐,苦瓜漢堡都算係一個好選擇。哩間 "Jef Burger" 有多間分店,我地選擇豊見城店係因為等間去"琉球ガラス村"比較方便,大家有興趣可到 "Jef Burger" 個 website 搵就近的分店。

哩個苦瓜漢堡其實應該叫苦瓜炒蛋漢堡 (我叫的一個仲有午餐肉,哈哈 ~),賣相普通但又幾好食喎,記得要叫有午餐肉那一款,好味D !! 但好奇怪,黎哩度食早餐都係幾十歲的公公婆婆,我地好似有點格格不入咁 ...... 哈哈哈




食完又再上路,今次目的地係"琉球ガラス村"。我地一早已經預約好11點鐘玻璃體驗,而我地亦都準時到達,無誤點~ ()

去到首先要去登記,拎住個號碼牌就有人帶你去燒玻璃的場地。玻璃體驗有得揀杯或者碟,我地現場所見除我地之外係無人揀碟 ...... 唔知係因為貴定係杯比較實際呢?!



睇人地整就好似好易,坐到埋去自己落手整先發現原來都唔易喎,好在我地係 Last 2 個,無人望住,唔係都幾樣衰。做碟收費貴D原來係因為比做杯多一個步驟,難度應該係比做杯高,而我地當然係向高難度挑戰啦。

簡單講講以下幾個步驟

1. 先吹脹個玻璃

2. 之後就要幫佢開口喇

3. 開口之後就要襟平佢

4. 咁就原成喇 ~
玻璃體驗之後又要搵地方醫肚,今次目的地係"百年古家大家",哩間係沖繩有名食 Agu 豬的食店,夜晚食一個 Agu 豬 shabu shabu 都幾貴下,我地選擇食晏晝,係因為"百年古家大家"離我地入住的 Resort 較遠,同埋我地諗住夜晚要食石垣牛,所以晏畫來一個到此一遊就算喇。







講真,環境真係幾唔錯,Agu豬麵就普普通通,反而吉列Agu豬就幾好味。我估哩間野應該都係食環境居多~ 臨走買左一包花生糖的物體我個人就覺得好好味喇。

離開"百年古家大家",下一站應該係去"万座毛"睇日落,但由於時間尚早,我地去左附近的"Aeon"行了一個圈,哩間"Aeon"非常之大,入面有 Uiquo,有 Best,有100yen 店,有超市。我地仲食左杯"Blue Seal"鹽味雪糕,不過味道只係一般般 (唔知點解其他人講到Blue Seal 幾咁好味......),反而之後"鹽屋"杯鹽味軟雪糕就好好味。



哩包青提好抵買,626 yen only ~
"万座毛"係沖繩必到景點之一,根據 Wikipedia 所講,"琉球王朝時代的尚敬王曾評價此地為:「能供萬人坐下的『毛』(指原野)」(原文:「万人を座するに足る毛」),名稱即由此而來。"

如果大家要到"万座毛"的話,要留意該停車場非常之細,見到位就好泊喇,唔好揀喇,因為好大機會要等位。我地好好彩去到有車走,俾我地泊到一個靚位。



離開"万座毛"就去 Resort Check-in 喇。Kafuu Resort Fuchaku CONDO HOTEL 佔地唔大,但入面D房就好大間,好舒服。要留意 Kafuu Resort 個入口都幾隱蔽,要先經小路轉上去,路口只有一個小小的牌,要小心唔好睇漏眼。另外因 Kafuu Resort 無私人沙灘,Resort 有 Shuttle Bus 接載住客到鄰近收費/免費的泳灘,而 Resort 對出(隔一條馬路)的公共泳灘由於沒有救生設施,Resort 方面係不建議使用,不過如果唔係游水只係玩玩水的話應該無咩問題。

哩張相由呆太太拍攝 ~
休息一陣我地又出去搵食喇,今次目標係"琉球の牛"。哩間野我地2個星期前想訂位但訂唔到,唯有 Walk-in。好在我地都唔係等左好耐,大半個鐘咁上下就有位喇。哩個"琉球の牛"賣相比起琴晚好,感覺唔錯,味道都唔錯,錯在我地點錯餐,叫了2個 Set 都係牛扒,應該一個扒,一個薄切會更好。








食完去左隔離 "Family Mart" 買薯片 (沖繩限定),本來諗住先返酒店試食,好味返轉頭買,但一路都無機會食,無機會再買。返到香港開黎食,又幾好味喎 ...... 無再買,蝕左 ......

參考資料

  • Jef Burger ジェフ豊見城店
    營業時間: 24小時
    地址: 沖縄県豊見城市字田頭66-1
    電話: 098-856-1053
    MapCode: 33 034 259

  • 琉球ガラス村
    營業時間: 9:00-18:00
    地址:---
    電話:0989-97-4784
    MapCode: 232 336 224

  • 百年古家大家
    營業時間: 11:00-22:00
    地址:沖繩縣名護市中山90
    電話:0980-53-0280
    MapCode: 206 745 055

  • AEON 名護店
    營業時間: 9:00-0:00
    地址:名護市字名護見取川原4472
    電話:0980-54-8000
    MapCode: 206 688 642

  • 万座毛
    營業時間: ---
    地址:沖縄県国頭郡恩納村恩納2571
    電話:---
    MapCode: 206 312 097

  • 琉球の牛
    營業時間: 17:00-23:30 (Last order 23:00)
    地址:沖縄県国頭郡恩納村前兼久909-2 1F
    電話:098-965-2233
    MapCode: 206 096 686




Powered by Blogger.