Tokyo 2012 Day 6

by 12:06 PM
最後一日,由於早幾日食築地時唔係好夠喉,所以今日決定 encore !! 今次目標係『壽司大』,但好可惜,條龍係超長 .... 最後轉戰『壽司大和』。之前經過『壽司大和』都好多人排隊,唔知係咪今日早到呢,只係排幾個人。我地先叫一個壽司 set,之後再後加 toro 同 urchin。wooo ........ 海膽 .... 超超超好味,仲要超多 !!! 食落口真係超滿足 ~
你睇 .... 幾多海膽 !!!!

toro 都好味,但比起海膽就爭少少 .... 少了一點滿足感

2 個人埋單 8,600 yen,食完就回程返酒店 check out,今次旅程就完結喇 ....

- 第六日完 -

參考資料

Tokyo 2012 Day 5

by 12:05 PM
今日會去鬼太郎茶屋同留在新宿 shopping,鬼太郎茶屋為於調布,由新宿出發車程大約 25 分鐘。


今日早餐食一間叫『はなまるうどん』(花丸烏冬) 的讚歧烏東店,同之前『東京麵通團』一樣都係 "車仔" 烏冬,即係買完烏冬再自己揀餸。


食飽去新宿駅搭京王新線去調布,一程車無須轉車。落車之後行過對面 Parco 門口搭 14 號巴士,上車後去到總站落車就係喇,車程約 20 分鐘。一落車就見到鬼太郎茶屋啦,其實佢只係一間為於深大寺前的一間店舖,而去深大寺大多是老人家,同佢地一齊搭車 ... 好奇怪,我地好似異類,再者佢地搭車係免費 (可能好似我地老人八達通半價咁掛) .... 基本上要俾錢搭車的人不出 5 人 (已經計埋我地 2 個)。

溫馨提示 : 新宿及調布都係大站,所有列車都會停哩兩個站,建議大家乘搭 "特急" 列車,上面 20 分鐘車程係以 "特急" 計,如果搭 "快速" 起碼要用多十分鐘以上。





鬼太郎茶屋入面全部部都係鬼太郎精品,地下一層有一個小小茶室 (都有名你叫鬼太郎茶屋啦 !!),隔離係賣精品的地方,樓上有一個類似收藏館的東西 (我都係上網睇介紹,因為要俾錢,我地無上到去 ... 哈哈)。去到無理由唔買野嘛,我地買了一塊掛在門前的布 (呆太太話要自己 DIY 掛廁所門口喎),一個牆壁怪 figure,一盒鬼太郎果汁糖 .... 本來上網見到一隻杯好靚好想買,但係見唔到 .... too bad ~

離開鬼太郎茶屋我地入深大寺看一看,行了個圈之後返出車站搭 14 號巴士回調布駅。

回到新宿先返酒店休息一下,之後去食『金太郎』魚生飯 ...



食完魚生飯後就留在新宿 shopping,夜晚食了一間燒肉放提 .... 唔知係咪哩幾日食得太多,不在狀態,呆太太居然食得仲多 ~ 哈哈

- 第五日完 -

參考資料
  • 金太郎丼
    東京都新宿区歌舞伎町1-11-13

Tokyo 2012 Day 4

by 12:04 PM
今日行程會先到築地食早餐,之後就到上野買手信,最後就去吉祥寺行街。


9點多出發,搭都営大江戸線唔駛轉車就到達築地市場駅,車程半個鐘頭內,10點我地就到達築地喇。壽司大例牌超多人排隊,我地行返出魚市場,食一間叫『壽司清』。我地上次去築地係食壽司飯唔係食壽司,哩間『壽司清』我地係第一次食。



坐低先叫一個 set,睇睇有咩食再散叫,哩間『壽司清』普普通通唔係話特別好食,埋單兩個人 6,830 yen。呆太太食完之後話唔夠喉,想返去上次間壽司飯再食過 .... 不過最終都係無食到 ... 哈哈。

就係哩間壽司飯啦
跟住搭車去上野買手信,上野有 2 間鋪頭有好多零食賣,做手信 .... 一流 ~

由於哩個行程係臨時加插,之前無查過地圖,只好靠幾年前的記憶去搵啦 .... 記憶再加上 google map,總算搵得到 .... 勁 !! 中途仲去百果園食生果添。因為拎住太多野,我地於是返酒店放底手信再出發去吉祥寺。



去到吉祥寺未夠 4 點,先去搵一間叫『SATOU』買松阪牛肉球,哩間鋪好誇張,平日 4 點鐘都有成 30 人排隊,仲要個個都係買牛肉球。松阪牛肉球 180 yen 一個,5 個以上 140 yen,每人限買 20 個 (太多喇嘛 ?!)。排了大約半個鐘,終於都到我地喇,我地 2 個人買了 6 個牛肉球 (真係太多囉) ... 牛肉球係雖然係炸,但又唔係太油膩喎,同埋入面係有肉汁,算係幾好味。但一人食 3 個就未免太多喇 ...






晚餐返新宿食魚民 .... 嘩,好唔得囉,仲衰過香港和民。(噢!!)

認住佢 ... 超唔得 ~

宵夜又係食『一蘭』,已經係哩個東京之旅第二餐喇 ~ 哈哈哈

 - 第四日完 -

參考資料

Tokyo 2012 Day 3

by 12:03 PM
今日行程會先到御殿場 Premium Outlets,之後會到韮山摘士多啤梨。我地搭 9 點車由新宿西口總站出發,約個半鐘車程到達御殿場,落車之後等免費 shuttle bus 就得喇,好簡單無乜難度。



前往御殿場 Premium Outlets 有幾種方法。

    小田急箱根高速
    高速バスネット
    JR

小田急箱根高速單程 1,630 yen /來回 2,900 yen,好處係每半小時就有一班車,時間比較有彈性,車程大約 2 小時,落車後只要轉乘免費 shuttle bus。

高速バスネット來回車費 2,800 yen (不設單程),新宿直達御殿場 Premium Outlets 無須轉 shuttle bus,價錢比小田急箱根高速還要平,唯一唔好係每日只有 2 班車往返。

我諗好少人會搭 JR 去御殿場,因為 JR 同巴士車程一樣都要 2 小時,而且要轉車,不建議使用。

御殿場 Premium Outlets 好似話係日本最大的 outlets,都算幾多野賣,不過我地上去到東京時已經行過一次,今次唔係山逗留好耐就走,因為呆太太要去摘士多啤梨。由御殿場去韮山,Google map suggest JR 車程大約係一個鐘,我地已經預多時間搭 13:40 班 shuttle bus 去 JR 御殿場駅,但原來御殿場線列車非常之咁疏,我地去到仲要送車尾,結果等了大半個鐘頭車 .... 真無耐 ~!!

行程 :
JR御殿場線 (三島行) 前往三島駅,之後轉伊豆箱根鉄道駿豆線 (修善寺行) 前往韮山駅

溫馨提示 : 兩條線班次都非常之疏,如果要去真係要 check 清楚列車時間表。韮山いちご狩りセンター距離韮山駅大約 20-30 分鐘路程,的士的話大約要 800 yen,韮山應該係屬於鄕郊地方,人少車少,要搵的士都唔係咁容易。

我地落車已經係 3 點半,急步前往韮山いちご狩りセンター (因為人地收 4 點),沿途有路牌指示,唔難搵。去到已經 4 點喇,呆太太見到人地正在執野,拿拿聲飛跑埋去 .... 哈哈,最後都俾我地入去。之前去大阪都有摘士多啤梨,我地都一致覺得這裡的士多啤梨無大阪那次咁好食同埋無人地咁大粒。不過哩度好似無乜點計你時間,我地係食到飽自己走 (不過都係 20-30 分鐘) .......

你睇,人地關門收工喇 ...

 

食完士多啤梨我地又要踏上歸途喇 ... 其實係有 JR 返新宿的,不過我地之前買了小田急箱根高速的來回車票,所以要返去御殿場搭巴士 .....嗚 ~~

返到新宿已經 9 點,全日基本上無乜點食過野 (士多啤梨除外) ... 我地今晚去食牛角,哩間牛角有任飲同任食 .... 2個人加埋 9,000 yen


炭爐 ... 特別有風味

食得超飽,但好似無上次咁好食 ... 好似爭少少咁。

- 第三天完 -


參考資料

Tokyo 2012 Day 2

by 12:02 PM
由於第三日會去御殿場 Premium Outlets,所以今日要去買定飛。



買完飛就到『東京麵通團』 食烏東,哩間烏冬店的烏冬係店員於店內新鮮制造,入門口先向店員選擇烏冬底,之後就行入少少自己揀餸喇,最後就去俾錢同為烏冬加上熱湯。其實哩間烏冬都幾抵食,2個人都係 1,480 yen,算係咁啦。

烏冬全部新鮮制造
烏冬配天婦羅,正 ~

 食完早餐,下一站就係雷門寺。

新宿去雷門,連轉車大約半個鐘就到,我地搭都營地下鐵,轉一次車就到,都算幾方便,一出地鐵就人山人海 (因為今日係星期日)。


你睇幾多人 ~
雷門寺入面有商店街,可以買手信或者小食,寺前有個位置俾你求籤,入 100 yen,拿起籤筒就可以求,之後自己憑號碼搵返個籤文 ... 搞惦 ~



雷門之後下站就係原宿 ... 港人消費熱點。

凍到傻 ?!


行到天黑,又係時候要食野喇 ... 今晚食『鳥良』,一間較為高級的居酒屋,價錢亦都比較貴,2個人大約 8,000 yen。不過都幾好食 ~ 又係同一問題,好少款式。


是晚宵夜係『博多天神拉麵』,我地一晚 keep 住要食一餐以上 ... 哈哈哈



- 第二日完 -

參考資料


Tokyo 2012 Day 1

by 12:01 PM
1月14日大清早就出發喇,食完早餐 9:05 準時起飛 .... 2012 東京之旅 >> 出發 !!
哩張相明顯就唔係我影啦 !!

任何時間都會見到呆太太篤緊個電話,有圖為證 :

等上機時 ... 篤篤篤
搭緊 Narita Express 時又係篤篤篤

9點機,4個鐘頭後就到達成田機場喇,拎完行李落樓下一層買張 Suica & N'EX 搭 Narita Express 出新宿。來回票價 5,500 yen,包一張 1,500 yen Suica 咭,我地 6 日全部交通都係用哩張 Suica (咁當然要再增值啦,1,500 yen 好快用完)。

溫馨提示 : Suica最好用晒入面全部錢,之後可以拎返去 JR 票務處全數退返 500 yen 按金 ; 但係如果張咭入面有錢,就要扣返 110 yen 手續費。

我地哩次行程係入住 Hotel Sunroute Plaza Shinjuku,為處新宿南口 5-10 分鐘路程,交通算係方便,大堂有 wifi (但太多人用,經常連唔到線),房內有 LAN port 上網,設施算係咁 ... 唯一不足就係房間出奇的細 ...

酒店大堂
哩張係呆太太坐在床尾影
無呃你,真係細到你唔信
所有野 Settle down 晒都成五點幾,先去新宿西口 Himawari Sushi 食壽司,哩間迴轉壽司我地上次來東京已經食過一次,都算幾好味而且價錢平,夠抵食 ~ 2個人埋單 4,000 yen 之後就到處走走。



是晚第二餐去係去一間叫『東方見聞錄』的居酒屋食野,哩間居酒屋有好多分店,入面人都幾多,但食物種類唔多,見到隔離枱來來去去都係叫啤酒同支豆 ... 問你死味。仲有一樣,原來日本居酒屋要收入場費 (純粹齋估,因為佢寫日文,唔知係咩來) 之類的東西,2個人埋單 5,000 yen。(唔抵食!!)


自助落單,無人 serve 你的
串燒款式好少
哩個好似係生牛肉
食完返酒店,好似唔係好飽,唯有再出去食過,食返個拉麵當宵夜。哩間『一蘭』其實好出名,但係直到我地上次去大阪先至第一次食,呆太太更加一食愛上。『一蘭』長期都要排隊,宵夜食就最好喇,無人排隊 ... 嘿嘿。一晚食三餐 ... 問你死未 ?!


- 第一日完 -

參考資料
Powered by Blogger.