大阪十天遊 Day 9 : 即食麵發明館 & 京都

由於呆太太投訴無得 shopping 買野，餘下的 2 日行程要作出一些改動。原先計劃係日頭去參觀夜晚去 shopping 買野，但由於日本百貨公司大部份 10 點就關門，而大阪街上的商店又不多，所以夜晚 shopping 哩個 planning 係錯誤的。為此，今日和明日的行程要濃縮埋一日，而明天就可以留返呆太太 shopping 喇。

事不宜遲，出發 !!

今日一早會去即食麵發明館，又係到なんば搭車，目的地係池田。池田落車之後跟住路牌指示就會搵到，唔難搵，車站行去亦只要大約 10 分鐘。

十個去即食麵發明館，十個都會自製一個杯麵，最好就預多一點時間，因為入場、設計杯麵圖案、選配料等等 ... 最起碼都要搞半個鐘，如果你要做唔止一個杯麵，就要更加多時間添。我地就用了一個上午搞哩 5 個杯麵喇。

即食麵發明館是免費入場的，但要自製一個杯麵，你就要俾 300 yen 買一個杯麵的杯，之後就可以在上面畫上喜歡的圖案，在場職員會幫你安排位置慢慢畫，就算你畫半日都無人會趕你。畫好就可以去排隊 "做" 杯麵啦，其實所謂 "做"，只係將個杯交俾職員幫你入麵、加配料、封口 .... 當然你會睇到每一個步驟啦。職員將麵入杯之後，你就可以揀湯底喇 (日本的湯底同我地香港有售的湯底口味有點不同)，之後就揀配料 .... 選好之後就封口啦，一個杯麵就咁樣完成喇。為了方便你攜帶，佢地會提供吹氣袋袋俾你包住個杯麵 (好精緻) ~

人山人海!!

呆太太杯麵 ~

一個個麵已經 ready 入杯喇 ~

有好多配料俾你揀，仲有部份係"期間限定"添

除了做杯麵，入面仲有其他即食麵歷史呀、介紹呀 .... 咁啦 ~ 不過我地一心只係做杯麵，整完就走喇，同埋我地要趕去下一個目的地 : 京都。京都其實好大，我原先的計劃係會用一日時間遊覽，但而家只有半日時間，所以我地只係去一個 "八阪神社" 就算喇 ....  清水寺、二年阪、三年阪都無去到。去到京都，第一件事就係搵野食，我地去了一間食拉麵的店舖，日本的拉麵真係比起香港好食。

呆太太最鍾意，多蔥 ~~

京都最高人氣的景點應該係清水寺，但由於時間關係，我地去唔到清水寺，咁唯有去八阪神社啦，因為佢比較近地鐵站。其實去京都唔係參觀寺廟就係神社，雖然悶，但其實入面環境都幾靚，影相就最適合喇。

八阪神社位於繁華的街道之上

入去神社前要洗一洗手

之後我地去了一間賣布袋好出名的店舖，入面超級非常多人，好多都係國語人，而呆太太買了一個小布袋。之後去了一間又係好出名賣面油紙的店鋪，行了一陣就回程返難波喇。京都比起大阪凍，我地仲見到落雪添 (我開頭以為點解咁多灰周圍飄)。

 

返到大阪，我地又再食 "地魚台屋" ....同埋 "昭和燒肉" ..... 哈哈哈，哩 2 間野係咁多日來我地覺得最好食 ~

參考資料 :

即食麵發明館
大阪府池田市満寿美(ますみ)町 8-25
Tel : (072) 752-3484
網址 : http://www.nissin-noodles.com/

八阪神社
京都市東山区祇園町北側625番地
Tel : (075) 561-6155
網址 : http://web.kyoto-inet.or.jp/org/yasaka/index.html

一澤信三郎帆布
京都市東山区東大路通古門前北
Tel : (075) 541-0436
網址 : http://www.ichizawashinzaburohanpu.co.jp