大阪十天遊 Day 7 : 白濱 Adventure World

今日好早起身,一起身就落去浸返個溫泉先去食早餐,朝早無咁大風,浸得比較舒服,同埋可以睇到無敵海景。因為 11 點要 check out,食完早餐拿拿聲返上去執野 check out。今朝個早餐同昨晚個晚餐真係爭好遠 ... 昨晚個晚餐好食好多。

由於白濱交通不太方便,為免浪費時間等巴士,我地決定租一日車。Check out 之後本來想問一下點搭車到取車處,點知個經理好好人咁幫我地打電話去租車公司搵人來車我們,慳返一程車,之前 book 車的時候都講明無 pick-up service,就當 bonus 啦 .... 呵呵。

取車後就去第一個景點 ... Adventure World。




Adventure World 同我地海洋公園差唔多,不過地方細好多同動物多好多。入場費都唔平,要 3,600yen,哩個已經係 discount price,原價係 3,800 yen。入面有機動遊戲,但要另外收錢,同埋個樣唔係好好玩 ... 我諗哩度個賣點係動物而唔係機動遊戲囉。

一入門口個水池位就已經有幾隻企鵝等你喇 ~~
 

北極熊
無頭企鵝 ?! 哈哈,係咪好搞笑呢 ?
Adventure World 除了館內的動物,好似企鵝、北極熊之外,仲有一個野外動物區,可以坐觀光巴士或者觀光車近距離睇動物。觀光車同觀光巴士分別在於觀光車的路線由駕駛者 (哩個駕駛者係 Adventure World 的工作人員,唔係你呀 !!) 決定,佢會比觀光巴士駛得更接近各種動物,但觀光車係要另外收費的。我地當然就係搭觀光巴士啦,哈哈。

 

有得餵獅子 ~

熊出沒 !!




同海洋公園一樣,哩度都有動物表現。而重頭戲就係企鵝巡遊喇,佢地會圍住行一個圈,個圈唔係好大,但佢地要行好耐,因為佢地真係行得好慢 ...哈哈


除了企鵝,哩度另一種最受歡迎的動物就係熊貓喇。而哩度的熊貓數目比起我地海洋公園仲要多好多添,睇個圖表應該有成 12 隻熊貓。




其實 Adventure World 入面都幾多野睇,起碼可以玩大半日,但我地時間比較趕同埋天氣凍,我地大約 3、4 點就要走喇,之後就去搵野食。本來一心諗住返去 tore tore market 附近食壽司,但唔識用個 GPS,搞了大半個鐘先識用,仲要 set 錯地址,唯有是但搵地方食啦,因為太肚餓喇。食完我地就拿拿聲趕去今日最後一個景點円月島喇。話說円月島係一個睇日落的景點,理論上個太陽係會穿過中間個窿,但實際係咪會出現就真係不得而知喇,起碼我地就見唔到哩個情景。




當日風實在太大,好在我地可以在車內等日落,如果搭巴士去就真係唔知點算,吹到頭都爆。睇完日落我地就向溫泉旅館出發喇,我地今晚會住白浜温泉ホテル天山閣湯楽庵。本來對哩間天山閣好有期望,但係我上樂天預訂的時候應該揀錯,同一集團有 2 間都叫天山閣,應該一間平一間貴,我地本來揀貴那一間但係 book 錯平那一間 .... 唉。


事實上哩間旅館都唔係太差,係個私家風呂有點搵笨,望出去又無 view .... 不過算啦,個晚餐都幾好食 ... 價錢又唔係貴 ... 將就一下啦。



參考資料 :
日産レンタカー 南紀白浜
649-2211 和歌山県西牟婁郡白浜町 2872-5
TEL : 0739-42-4123
網址 : http://www2.tocoo.jp/smarty_ctrl/auto.php?file=car_rental_application/branch&id=05283&prefecture=30

ホテル天山閣 湯楽庵
和歌山県西牟婁郡白浜町2927-553
TEL : 0739-82-2616
網址 : http://yurakuan.net/

No comments

Powered by Blogger.